Cushman & Wakefield | Veritas Brown-ის, საქართველოს ეროვნული საინვესტიციო სააგენტოსა და აჭარის მთავრობის ორგანიზებით ბათუმში საინვესტიციო ფორუმი გაიმართა, რომელსაც სამთავრობო მაღალჩინოსნები, ბიზნესმენები და ქართველი და უცხოელი ინვესტორები დაესწრნენ – ჯამში 200-მდე ადამიანი. ფორუმზე საქართველოში ინვესტირების შესაძლებლობები და აჭარის რეგიონის ბიზნესპერსპექტივები განიხილეს. ღონისძიების შესახებ Forbes-ი CW|VB -ის მმართველ პარტნიორს, სტივ ბრაუნს ესაუბრა.
რამ ჩამოიყვანა ინვესტორები აჭარაში და რა შესაძლებლობებს სთავაზობდა მათ ღონისძიება?
უპირველეს ყოვლისა, ინვესტორებს კაპიტალის ბრუნვა აინტერესებთ, რაც იმას ნიშნავს, რომ მათთვის მიმზიდველია სტაბილური ბიზნესგარემო, ზრდადი ბაზარი, სტაბილური ვალუტა და სტაბილური სახელმწიფო. დამსწრეებისთვის „ბათუმი 2015“ გახლდათ პლატფორმა ბაზრის შემცვლელი სიახლეების აღმოსაჩენად, ინვესტორებთან შესახვედრად და საკუთარი გამოცდილებისა თუ ხედვის გასაზიარებლად. მათ აინტერესებთ, რა ბერკეტებით მიიღწევა რეგიონული ზრდა, რათა კაპიტალდაბანდებებმა მეტი შემოსავალი მოიტანოს. ღონისძიება, რა თქმა უნდა, პროფესიონალ ინვესტორთა შორის ცოდნის გაზიარებასაც ემსახურებოდა.
ფორუმი ადგილობრივ და უცხოელ ინვესტორებთან, რეგიონული და ცენტრალური მთავრობის წარმომადგენლებსა და ბიზნესორგანიზაციებთან შესახვედრად ხელსაყრელ შესაძლებლობებს იძლეოდა. დამსწრეებს სხვადასხვა საინვესტიციო პროექტი და ადგილობრივი ბიზნესკლიმატი გააცნეს. მათ მიიღეს ინფორმაცია კომერციული უძრავი ქონებისა და სასტუმროების დეველოპმენტის სექტორის ვითარების შესახებ, რათა მომავალში ყოველმხრივ სასარგებლო თანამშრომლობები დამყარდეს. გაიმართა დისკუსიები ვაჭრობის, ტრანსპორტის, ტურიზმის, ინფრასტრუქტურისა და უძრავი ქონების სფეროების შესახებ და დაისახა სამომავლო პერსპექტივა.
რამ მისცა ბიძგი CW|VB-ის გადაწყვეტილებას, ღონისძიება საქართველოს ეროვნული საინვესტიციო სააგენტოსა და აჭარის მთავრობასთან ერთად გაემართა?
CW|VB-მა საინვესტიციო სააგენტოსთან ერთად მსგავსი ფორუმი მიმდინარე წლის მაისში, ლონდონში გამართა. ფორუმი პოზიტიური შედეგით დაგვირგვინდა. ჩვენ წარვადგინეთ ქვეყანა, როგორც ახალი საინვესტიციო შესაძლებლობა და, იმედი მაქვს, მივაღწიეთ საერთაშორისო აღიარებას იმ კუთხით, რომ ქვეყანაში ინვესტიციის ჩადება უსაფრთხოა. საქართველოს ლიბერალური ეკონომიკა აქვს და ვფიქრობ, მას გააჩნია პოტენციალი, ბიზნესის რეგიონულ ჰაბად მოგვევლინოს.
ჩვენ პირველი საერთაშორისო კომერციული უძრავი ქონების კომპანია ვართ ქართულ ბაზარზე და გვაქვს შემდგარი ისტორია ამ რეგიონში, ასე რომ, ვიცნობთ ადგილობრივ ბაზარს და ვიცით, როგორ „აკეთებენ ბიზნესს“ დეველოპერები და ინვესტორები. ვინაიდან გახლავართ Cushman & Wakefield-ის რეგიონული პარტნიორები, ხელი მიგვიწვდება ინდუსტრიის პროფესიონალებზე, შიდა ექსპერტიზასა და გლობალურ პლატფორმაზე, რათა უმაღლესი ხარისხის სერვისების ოპერირება შევძლოთ. შესაბამისად, ჩვენ მშვენივრად ვართ პოზიციონირებულები საქართველოსკენ ინვესტორთა მოსაზიდად და ამგვარად ქვეყნის განვითარების ხელშეწყობისთვის.
2014 წელს საქართველომ 189 ქვეყანას შორის მე-15 ადგილი დაიკავა ბიზნესის კეთების სიმარტივის რეიტინგში, მაგრამ ეკონომიკური ზრდის მიხედვით იგი მხოლოდ 127-ე ადგილზეა სავალუტო ფონდის 188 წევრ ქვეყანას შორის. თქვენი აზრით, რა გამოწვევებს უნდა უპასუხოს საქართველომ და აჭარამ, რომ პირდაპირი უცხოური ინვესტიციებისთვის უფრო მიმზიდველად წარმოჩნდეს?
საქართველო და განსაკუთრებით აჭარის რეგიონი სწრაფად ექცევა ინვესტორთა ფოკუსში. საქართველომ უნდა განაგრძოს კომპანიის რეგისტრაციის პროცედურების გამარტივება, საწარმოო რეგულაციების ლიბერალიზაცია, უკეთესი საგადასახადო და საკანონმდებლო ბაზის შექმნა და ზოგადად, უცხოელი ინვესტორების მისამართით პოზიტიური ნაბიჯების გადადგმა. ამჟამად საქართველო კარგი ადგილია ინვესტირებისთვის. ეკონომიკური და პოლიტიკური სტაბილურობაც მნიშვნელოვანი ფაქტორებია.
როგორ შეაჯამებდით ღონისძიებას? რა პირდაპირი შედეგი მოჰყვა კონფერენციას?
დელეგატების შეფასებები ძალიან პოზიტიური იყო, მაგრამ რეზულტატს მყისიერად ვერ დავინახავთ. ეს ხანგრძლივი პროცესია, რომლის შედეგებიც ახლო მომავალში გამოიკვეთება. ერთი რამ ნათელია – საქართველომ მრავალჯერ მოახდინა იმის დემონსტრირება, რომ აქ შესანიშნავი საინვესტიციო გარემოა. ფორუმმა საქართველო ინვესტიციებისთვის კარგ დანიშნულების ადგილად წარმოაჩინა. CW|VB-ის სახელით შემიძლია განვაცხადო, რომ პოზიტიურ შედეგებსა და დაგეგმილი პროექტების განხორციელებას მოველით.
