Salo Papalashvili

FDA-მ Neuralink-ს ტვინის იმპლანტის მეორე პაციენტისთვის გადანერგვაზე ნებართვა მისცა

1 წუთის წასაკითხი
Presented by

ამერიკის შეერთებული შტატების სურსათისა და მედიკამენტების ხარისხის კონტროლის სააგენტომ (FDA) ილონ მასკის სტარტაპ Neuralink-ს ნება დართო, ტვინის იმპლანტი მეორე პაციენტზეც გამოცადოს. ინფორმაციას Wall Street Journal-ი ავრცელებს.

Neuralink-ის ტვინის იმპლანტი ადამიანზე პირველად მიმდინარე წლის დასაწყისში გამოცადეს. ოპერაციის შემდეგ პაციენტი თავს კარგად გრძნობდა და შედეგებიც იმედის მომცემი იყო. მოგვიანებით მასკმა პაციენტის პროგრესზეც ისაუბრა და აღნიშნა, რომ Neuralink-ის პირველ პაციენტ ადამიანს, რომელსაც ტვინში მცირე ზომის ჩიპი ჩაუდგეს, საკუთარი ფიქრებით კომპიუტერის მაუსის კონტროლი შეუძლია.

თუმცა ამ თვის დასაწყისში Neuralink-მა განაცხადა, რომ პაციენტის ტვინში ჩადგმულმა მცირე ზომის მავთულებმა ადგილმდებარეობა შეიცვალა. Reuters-ის ინფორმაციით, ამ შედეგისთვის მასკის სტარტაპი მზად იყო, რადგან მსგავსი შემთხვევები ცხოველებზე ტესტირების პროცესშიც დაფიქსირდა.

WSJ-ის ინფორმაციითვე, არსებული პრობლემის გადაჭრას, Neuralink-ი მოწყობილობის ზოგიერთი მავთულის ტვინში უფრო ღრმად შეყვანით შეეცდება. Neuralink-ი მეორე პაციენტს ტვინის იმპლანტს სავარაუდოდ ივნისში გადაუნერგავს. მასკის სტარტაპი მხოლოდ წელს ტვინის იმპლანტის გადანერგვას ათ პაციენტში გეგმავს.

შეგახსენებთ, რომ Neuralink-მა ჩიპის იმპლანტაციის ნებართვა აშშ-ის მარეგულირებელი ორგანოსაგან გასული წლის სექტემბერში მიიღო. ცდაში მონაწილეობის მსურველებს აპლიკაციების შევსება ჯერ მხოლოდ ამერიკის შეერთებულ შტატებში შეუძლიათ, თუმცა სტარტაპი შეთავაზებით კანადასა და გაერთიანებულ სამეფოში გასვლასაც გეგმავს.

უახლესი

ნიუსლეთერი

სიახლეები თქვენს ინბოქსში

მეტი წასაკითხი

გააზიარე სტატია