Salo Papalashvili

კანადის ხანძრების კვამლის გამო, ნიუ-იორკი მსოფლიოს ყველაზე დაბინძურებული ქალაქი გახდა

1 წუთის წასაკითხი
Presented by

კანადაში, ტყის ხანძრების ასობით კერის შედეგად წარმოქმნილი კვამლის გავრცელების გამო, ნიუ-იორკში ჰაერის ხარისხის დონე ჯანმრთელობისთვის საშიშ ზღვრამდე დაეცა. ქალაქის ოფიციალურმა წარმომადგენლებმა არასრულწლოვანებსა და მაღალი რისკის ქვეშ მყოფ პირებს, სახლში დარჩენისკენ მოუწოდეს.

ჰაერის ხარისხის გლობალური ტრეკერის, IQAir-ის თანახმად, სამშაბათს საღამოს, ნიუ-იორკმა შესაძლოა დროებით, თუმცა მაინც გადაუსწრო ნიუ-დელის და მსოფლიოში ყველაზე დაბინძურებული ქალაქი გახდა. გარემოს დაცვის სააგენტო AirNow-ის მონაცემებით, ქალაქის მასშტაბით ჰაერში PM 2.5-ის დონე 213-მდე გაიზარდა. შეგახსენებთ, რომ WHO-ის სტანდარტით, ჰაერის დაბინძურების დონე იმ მცირე და საშიში ნაწილაკების, PM2.5-ის კონცენტრაციის მიხედვით იზომება, რომელთა დიამეტრი 2.5 მიკრონზე მცირეა. ნაწილაკებმა შესუნთქვისას შესაძლოა ფილტვებში შეაღწიონ, სისხლის ნაკადში გადავიდნენ და ყველა ძირითადი ორგანო დააზიანონ.

ჯანდაცვის მსოფლიო ორგანიზაციის (WHO) შეფასებით, ნიუ-იორკში ჰაერის ხარისხი ჯანმრთელობისთვის საშიშ მაჩვენებელს მიუახლოვდა და მხოლოდ ერთი დონით ჩამორჩება, ყველაზე საშიშ კატეგორიას. გარდა ამისა, WHO-ის განცხადებით, ქალაქში ჰაერის ხარისხი ორგანიზაციის მიერ მიჩნეულ უსაფრთხო დონეს 14-ჯერ ჩამოუვარდება. ამინდის ეროვნულმა სამსახურმა მოსახლეობისთვის შესაბამისი რეკომენდაციები უკვე გამოაქვეყნა, რომელიც ძალაში ოთხშაბათის, 23:59 საათამდე დარჩება.

ჩრდილო-აღმოსავლეთ რეგიონში ჰაერის ხარისხის მკვეთრი გაუარესება კანადის პროვინცია კვებეკში ტყის ხანძრების ასეულობით კერის შედეგია. ნიუ-იორკის გარდა, ჰაერის ხარისხი მკვეთრად გაუარესდა დეტროიტსა და ტორონტოშიც. კანადის ოფიციალური პირების ინფორმაციით, ხანძრების გამო, ქვეყნის მასშტაბით 26,000 ადამიანის ევაკუირება გახდა საჭირო. ხანძრის გაჩენის მიზეზი ამ ეტაპზე დადგენილი არაა.

უახლესი

ნიუსლეთერი

სიახლეები თქვენს ინბოქსში

მეტი წასაკითხი

გააზიარე სტატია