დავით ბერაძე

რუსეთი ოკუპირებულ აფხაზეთში საზღვაო ბაზის აშენებას გეგმავს – გაზეთი „Izvestiya”

1 წუთის წასაკითხი
Presented by

გაზეთ „Izvestiya”-ში გამოქვეყნებული ოკუპირებული აფხაზეთის დე ფაქტო პრეზიდენტის, ასლან ბჟანიას ციტატის თანახმად, რუსეთი შავი ზღვის აღმოსავლეთ სანაპიროზე, აფხაზეთში საზღვაო ბაზის აშენებას გეგმავს. გავრცელებული ინფორმაციით, მუდმივი სამხედრო-საზღვაო ბაზის აფხაზეთში განთავსების შესახებ შეთანხმებას ხელი უკვე მოეწერა. გაზეთმა „Izvestiya”-მ ინფორმაცია ამის შესახებ ასლან ბჟანიას რუსეთის პრეზიდენტ ვლადიმირ პუტინთან შეხვედრიდან მეორე დღეს გაავრცელა.

შეგახსენებთ, რომ რუსეთის შავი ზღვის სამხედრო ფლოტი, რომელიც ანექსირებული ყირიმის ნახევარკუნძულზე, სევასტოპოლში მდებარეობს, უკრაინული არტილერიის ერთ-ერთი მთავარი სამიზნეა.

გაზეთის მიერ გავრცელებულ ინფორმაციაზე დაყრდნობით, ოკუპირებული აფხაზეთის დე ფაქტო პრეზიდენტმა ასლან ბჟანიამ ოჩამჩირის რეგიონში მუდმივი სამხედრო-საზღვაო ბაზის მშენებლობის ნებართვას ხელი მოაწერა. „ამ გადაწყვეტილების მიზანია, გავაძლიეროთ როგორც რუსეთის, ისე აფხაზეთის თავდაცვითი შესაძლებლობები და ამ სახის თანამშრომლობა მომავალშიც გაგრძელდება. არსებობს კიდევ სხვა საკითხები, რაზეც ვერ ვილაპარაკებ“, – განაცხადა ასლან ბჟანიამ.

ოჩამჩირეში რუსული სამხედრო-საზღვაო ბაზის გახსნის საკითხი აქამდეც დამდგარა დღის წესრიგში. მსგავსი სურვილი ოკუპირებული აფხაზეთის დე ფაქტო ხელისუფლებამ 2009 წელსაც გამოთქვა, რასაც ნატოს მხრიდან უარყოფითი რეაგირება მოჰყვა.

უახლესი

ნიუსლეთერი

სიახლეები თქვენს ინბოქსში

მეტი წასაკითხი

გააზიარე სტატია