2023 წელს ამერიკის შეერთებული შტატების თავდაცვის დეპარტამენტის ბიუჯეტმა 609.2 მილიარდი აშშ დოლარი შეადგინა, რაც აშშ-ის თითოეულ მოსახლეზე $1,819-ს უდრის.
მართალია, ბოლო რამდენიმე ათწლეულის განმავლობაში ინდუსტრიაში თავდაცვის კონტრაქტორების მცირე რაოდენობა დომინირებს, თუმცა მათი უმეტესობა შესაძლებლობების დივერსიფიცირებულ სპექტრს უზრუნველყოფს – საბრძოლო მასალითა და ბირთვული წყალქვეშა ნავებით დაწყებული, IT-ინფრასტრუქტურის მართვის სერვისებით დამთავრებული.
Visual Capitalist-მა, თავდაცვის დეპარტამენტის მონაცემების საფუძველზე, აშშ-ის თავდაცვის უმსხვილესი კონტრაქტორების სია შემოგვთავაზა. ჩამონათვალში კომპანიები მათთან გაფორმებული კონტრაქტების საერთო ღირებულების მიხედვითაა დალაგებული.
61.4 მილიარდი დოლარის ღირებულების კონტრაქტებით, სიას Lockheed Martin-ი დიდი უპირატესობით ლიდერობს. აღსანიშნავია, რომ 2023 წელს მან პენტაგონისა და მოკავშირეებისთვის 30 მილიარდი დოლარის ღირებულების კონტრაქტი შეასრულა, რომელიც F-35 გამანადგურებლების აგებას ითვალისწინებდა. ამასთან ერთად, Lockheed Martin-ს მიენიჭა კონტრაქტები ზუსტი დარტყმის რაკეტებისა და ბირთვული კოსმოსური ხომალდების წარმოებისთვის.
შემდეგ მოდის RTX, ყოფილი Raytheon Technologies-ი, 24.1 მილიარდი დოლარის ღირებულების კონტრაქტებით. ის მსოფლიოში თავდაცვის სფეროს ყველაზე ძვირად ღირებული კომპანიაა. RTX-ის ღირებულება 183 მილიარდი დოლარია, რაშიც დიდი წვლილი მის სარაკეტო სისტემებს, ავიაციასა და მოწინავე ტექნოლოგიებს მიუძღვის.
მესამე ადგილზე ვირჯინიაში დაფუძნებული General Dynamics-ია, რომელიც ყველაზე მეტ შემოსავალს თავისი IT-სისტემებიდან და საზღვაო ქვეითების განყოფილებებიდან გამოიმუშავებს.
საერთო ჯამში, თავდაცვის დეპარტამენტის მთავარი კონტრაქტორების რაოდენობა 1990-იან წლებში 51-დან დღეს მხოლოდ ხუთამდეა შემცირებული. ამ მემკვიდრეობით მიღებულ კომპანიებს შორისაა: Lockheed Martin-ი, RTX Corporation-ი, General Dynamics-ი, Boeing-ი და Northrop Grumman-ი.
წარმოგიდგენთ აშშ-ის მთავრობასთან გაფორმებული კონტრაქტების ჯამური ღირებულების მიხედვით თავდაცვის სფეროს ტოპ-10 კომპანიას:
| პოზიცია | კომპანია | კონტრაქტების ღირებულება |
|---|---|---|
| 1 | Lockheed Martin | $61.4 მილიარდი |
| 2 | RTX | $24.1 მილიარდი |
| 3 | General Dynamics | $22.9 მილიარდი |
| 4 | Boeing | $20.1 მილიარდი |
| 5 | Northrop Grumman | $16.3 მილიარდი |
| 6 | Huntington Ingalls | $10.5 მილიარდი |
| 7 | Humana | $7.8 მილიარდი |
| 8 | L3Harris Technologies | $7.5 მილიარდი |
| 9 | BAE Systems | $7.0 მილიარდი |
| 10 | Cencora | $4.4 მილიარდი |
