აშშ-ის სურსათისა და მედიკამენტების ხარისხის კონტროლის სააგენტომ (FDA) ალცჰაიმერის დიაგნოსტიკისთვის სისხლის პირველი ტესტი დაამტკიცა. FDA-სგან ავტორიზაციის მიღება ნიშნავს, რომ აშშ-ის ფარგლებში მოწყობილობის გაყიდვა დ გამოყენება დაშვებული გახდება.
სადიაგნოსტიკო მოწყობილობა, რომელიც ალცჰაიმერის დადგენას სისხლის ანალიზის საშუალებით ახდენს, იაპონურმა ბიოტექნოლოგიურმა კომპანია Fujirebio-მ შეიმუშავა. ახლად დამტკიცებული მოწყობილობისგან განსხვავებით, FDA-ს მიერ ადრე ავტორიზებული ტესტები ცერებროსპინალური სითხის ნიმუშებს იყენებდა, რომლებსაც პაციენტების ზურგის ტვინიდან იღებდნენ.
FDA-ის წარმომადგენლების განცხადებით, სააგენტოს მიერ Fujirebio-ს სისხლის ტესტის დამტკიცება დაავადების ადრეულ ეტაპზევე დიაგნოსტიკას გაამარტივებს და ამ პროცედურას ამერიკელი პაციენტებისთვის უფრო ხელმისაწვდომს გახდის. FDA-ის კვლევამ აჩვენა, რომ სისხლის ტესტს შეუძლია გამოავლინოს ცილოვანი მდგომარეობა, რომელიც ალცჰაიმერის დაავადებას უკავშირდება.
დაავადებათა კონტროლისა და პრევენციის ცენტრის მონაცემებით, აშშ-ში ალცჰაიმერის მქონე ამერიკელების სავარაუდო რაოდენობა დაახლოებით 6.7 მილიონია, ხოლო 2060 წლისთვის მათი რაოდენობის გაორმაგების საშიშროება არსებობს. ალცჰაიმერი ქრონიკული ნეიროდეგენერაციული დაავადებაა, რომელიც 65 წელს გადაცილებულ ამერიკელთა დაახლოებით 10%-ში იჩენს თავს.
