ფეხბურთის ეროვნული ლიგის გუნდების ღირებულებები ერთ ადგილას გაიყინა.
გასულ წელს საშუალო ფრანშიზის ღირებულება 2%-ით, $2.57 მილიარდამდე გაიზარდა. ეს ყველაზე მცირე ზრდა იყო 2011 წლის შემდეგ, როცა საშუალო მაჩვენებელმა მხოლოდ 1.4%-ით მოიმატა. ინფლაციის გათვალისწინებით, ღირებულებები წელს 0.7%-ით დაეცა.
ძირითადი მიზეზი იმ ადამიანების დეფიციტია, რომლებიც NFL-ის გუნდის 30%-ის შესაძენად ლიკვიდურ ქონებას ფლობენ. როცა გასულ სეზონზე ჯერი რიჩარდსონმა Carolina Panthers-ი გასაყიდად გაიტანა, ზოგი ექსპერტი პროგნოზებს აკეთებდა, გუნდი $3 მილიარდადაც კი შეიძლება, გაიყიდოსო. ის $2.3 მილიარდად მილიარდერმა დევიდ ტეპერმა იყიდა, იმიტომ რომ ერთადერთი ადამიანი იყო იმ ვითარებაში, ვინც საკმარის ნაღდ ფულს ფლობდა, ლიგის დაფინანსების წესები რომ დაეკმაყოფილებინა.
NFL-ის მფლობელობის მოთხოვნები ყველაზე მკაცრია აშშ-ის ოთხ მსხვილ ლიგას შორის. გუნდის გაყიდვაზე თუ მიდგება საქმე, გენერალური პარტნიორი, სულ მცირე, 30%-ის მფლობელი უნდა გახდეს, ხოლო სესხის მაქსიმალური ოდენობა, გუნდის დონეზე, $350 მილიონია. თუ, ვთქვათ, გუნდი $2.3 მილიარდად გაიყიდა, გენერალური პარტნიორის მინიმალური სააქციო კაპიტალი $585 მილიონი გამოვა, თუ დავუშვებთ, რომ მან გუნდისთვის მაქსიმალური ოდენობის სესხი უზრუნველყო.
სხვაგვარად რომ ვთქვათ, ამ საქმისთვის გაცილებით მეტია საჭირო, ვიდრე Forbes 400-ის წევრობა, რომელთაგან არაერთის სიმდიდრის წყარო უძრავი ქონება ან კერძო მფლობელობაში არსებული კომპანიებია. ამ საქმეს თხევადი ქონება სჭირდება, თანაც – ბლომად.
ერთი მიზეზი, რატომაც ეს ყველაფერი ერთი ინდივიდისათვის რთულად გასამკლავებელ საქმედ იქცა, არის კონტრასტი საფონდო ბირჟის გრძელვადიან ეფექტიანობას (რაც ლიკვიდური ქონების მთავარი წყაროა) და NFL-ის ფრანშიზის ღირებულებებს შორის. ბოლო 20 წლის მანძილზე გუნდების ღირებულებები თითქმის ცხრამაგ ზრდას აჩვენებს – ზრდის წლიური მაჩვენებელი 11.6%-ია, მაშინ როცა S&P 500-ისთვის ეს მაჩვენებელი 4.5%-ს შეადგენს. გარდა ამისა, NFL-ი კორპორაციული მფლობელობის უფლებას არ იძლევა. ლიგის წესები მაქსიმუმ 24 შეზღუდული პარტნიორის არსებობას ითვალისწინებს. ზემოთ განხილულ მაგალითს რომ დავუბრუნდეთ, შეზღუდულ პარტნიორებს $1.37 მილიარდის ჩაღვრა მოუწევთ ისე, რომ სიტყვას ვერ დაძრავენ გუნდის მართვასთან დაკავშირებით.
NFL-ის მოთხოვნები ეფექტური გამოდგა. 1999-ის შემდეგ, როცა არტმოდელი Baltimore Ravens-ის გაყიდვას დასთანხმდა, ლიგის არც ერთ გუნდს ფინანსური პრობლემები არ შეჰქმნია – ზედმეტად დიდი სესხის გამო. NFL-ში არ ყოფილა Los Angeles Dodgers-ის, New Orleans Hornets-ისა თუ Arizona Coyotes-ის მსგავსი ფიასკოები.
NFL-ი, რომელიც უკვე არის მსოფლიოში ყველაზე დიდი და მოგებიანი ლიგა (საშუალო გუნდის შემოსავალი – $427 მილიონს, ოპერაციული შემოსავალი კი $95 მილიონს შეადგენს), მალე კიდევ უფრო გამდიდრდება. მას შეუძლია, AT&T’s-ის DirecTV-სთან დადებული Sunday Ticket-ის ხელშეკრულება 2019-ში – ოთხი წლით ადრე – დატოვოს. მიმდინარე ხელშეკრულება, რომელიც წელიწადში საშუალოდ $1.5 მილიარდს უახლოვდება, 50%-ით უფრო ღირებულია, ვიდრე წინა.
Sunday Ticket-ის გაყიდვის პროცესი ცხელი იქნება. Amazon-ი და Disney-ის ESPN-ი, დიდი ალბათობით, დაინტერესდებიან, მით უფრო, თუ სპორტის სტრიმინგისადმი მათ ენთუზიაზმს გავითვალისწინებთ. Forbes-ის პროგნოზი ასეთია: Sunday Ticket-ის მომდევნო გარიგების საშუალო წლიური ღირებულება, შესაძლოა, ამჟამინდელზე ორჯერ მაღალი გამოდგეს.
ამას წინათ Dallas Cowboys-ის მფლობელმა, ჯერი ჯოუნსმა თქვა, რომ „ლეგალიზებული გემბლინგი გაზრდის იმ დროს, რა დროსაც ადამიანები NFL-ის ყურებაში ატარებენ ტელევიზორთან თუ ონლაინ, და, შესაბამისად, დადებითი გავლენა ექნება ჩვენი კონტენტის ღირებულებაზე“.
შედეგად, მფლობელობისა და დაფინანსების წესებში ყოველგვარ ცვლილებას თუ გამოვრიცხავთ, სქიზმა NFL-ის ეკონომიკასა და გუნდების გასაყიდ ფასებს შორის, სავარაუდოდ, გაღრმავდება. რაც აუცილებლად ცუდი რამ არ გახლავთ.
