აშშ-ის პრეზიდენტის, დონალდ ტრამპის გადაწყვეტილებით, სავაჭრო პარტნიორებს, მსოფლიოს 180 ქვეყანას, საპასუხო ტარიფები დაუწესდა. ტრამპის განმარტებით, აღნიშნული ტარიფების მიზანი სავაჭრო პარტნიორების მიერ აშშ-ისთვის დაწესებული ტარიფების ან სავაჭრო შეზღუდვების დაბალანსებაა. შესაბამისად, ტარიფების % ყველა ქვეყნისათვის ინდივიდუალურად განისაზღვრა. ჯამში ტარიფები აშშ-ში იმპორტირებულ $4.1 ტრილიონის ღირებულების პროდუქციაზე გავრცელდება.
თეთრი სახლის მიერ გამოქვეყნებული ოფიციალური დოკუმენტის თანახმად, 2024 წელს შესრულებულმა ეკონომიკურმა ანალიზმა დაადგინა, რომ 10%-იანი გლობალური ტარიფების დაწესება აშშ-ის ეკონომიკას $728 მილიარდით გაზრდის, გააჩენს დამატებით 2.8 მილიონ სამუშაო ადგილს, შინამეურნეობის შემოსავალს კი საშუალოდ 5.7%-ით გაზრდის.
დონალდ ტრამპის გადაწყვეტილებით, აშშ-ის ყველაზე მსხვილ სავაჭრო პარტნიორებს, ჩინეთს 34%-იანი (დაემატა უკვე დაწესებულ 20%-იან ტარიფს), ევროკავშირს კი 20%-იანი ტარიფები დაუწესდა. 100-ზე მეტი ქვეყნისთვის კი ტარიფები 10%-ით განისაზღვრა. მათ შორის არის საქართველოც. შესაბამისად, დღეიდან საქართველოდან აშშ-ში ექსპორტირებული საქონელი დამატებით 10%-ით დაიბეგრება.
სტატისტიკის ეროვნული სამსახურის მონაცემებით, გასულ წელს საქართველომ აშშ-ში $141 მილიონის ღირებულების პროდუქციის ექსპორტი განახორციელა, რაც თითქმის 50%-ით აღემატება 2023 წლის მაჩვენებელს ($97 მილიონი). გამოდის, რომ დაწესებული სატარიფო პოლიტიკის პირობებში, ქართულ ბიზნესს გადასახადის სახით დამატებით ჯამში $14 მილიონი უნდა გადაეხადა. საქსტატის მონაცემებით, წელს, პირველი ორი თვის განმავლობაში აშშ-ში ექსპორტზე $8.6 მილიონის ღირებულების პროდუქცია გავიდა.
2024 წელს აშშ-ში საქართველოდან ისეთი პროდუქციის ექსპორტი განხორციელდა, როგორიცაა: ფეროშენადნობები; შავი ლითონისგან დამზადებული მილები, მილაკები და ღრუ პროფილები; საფრენი აპარატების ნაწილები; ყურძნის ნატურალური ღვინოები; წყალბადი, ინერტული აირები და სხვა არალითონები; ხილისა და ბოსტნეულის წვენები; სპირტიანი სასმელები; ხის დაფანერებული პანელები და დაწებებული ფანერები; მინერალური და მტკნარი წყლები; ხის სამშენებლო ნაწარმი და სხვა.
