საქართველოს სტატისტიკის ეროვნულმა სამსახურმა საქართველოში ინფლაციის მაჩვენებლის შესახებ ანგარიში გამოაქვეყნა. საქსტატის მონაცემებით, მარტში წლიური ინფლაციის დონე 3.5%-ით განისაზღვრა. წინა თვესთან შედარებით ინფლაციის დონემ კი 1.1% შეადგინა.
2025 წლის მარტში საბაზისო ინფლაციისა და თამბაქოს გარეშე წლიური საბაზისო ინფლაციის მაჩვენებლებმა 2.4-2.4% შეადგინა. მარტში წინა თვესთან შედარებით ფასები ყველაზე მეტად სურსათსა და უალკოჰოლო სასმელებზე გაიზარდა. ფასების ცვლილებამ წინა თვესთან შედარებით ამ საქონლის ჯგუფში 2.8% შეადგინა. მეორე ყველაზე დიდი მატება ჯანმრთელობის დაცვის მომსახურების ჯგუფში დაფიქსირდა და 1.7% შეადგინა.
სურსათისა და უალკოჰოლო სასმელების კატეგორიიდან ფასები ყველაზე მეტად (+7.4%) ბოსტნეულისა და ბაღჩეულის პროდუქციაზე გაიზარდა. ჯანდაცვის კატეგორიაში კი ყველაზე დიდი მატება (+2.2%) სამედიცინო პროდუქციას, აპარატურასა და მოწყობილობებს შეეხო.
რაც შეეხება წლიურ ცვლილებას, ამ მხრივ ყველაზე მეტად ჯანმრთელობის დაცვის მომსახურება გაძვირდა (+8.8%). წლიურ ჭრილში ინფლაცია ასევე მკვეთრად შეეხო სურსათისა და უალკოჰოლო სასმელების (+6.6%), ასევე სასტუმროების, კაფეებისა და რესტორნების (+6.6%) კატეგორიას. +4.9%-ით არის გაზრდილი განათლების მომსახურების ფასებიც წინა წელთან შედარებით. ყველაზე დიდი კლება 2024 წლის მარტთან შედარებით კავშირგაბმულობის სექტორს აქვს (-12.4%).
